✍ مراجعة بقلم: غادة الناصر

وش كانت فكرة عرض «هبّت شماليّة»؟

أنغام الربابة وإيقاعات الدحة وصوت القصيد والفناجيل استقبلت الحضور وهيئتهم لعرض مجموعة «هبّت شماليّة» من دار «قرمز» في مشهد حسي يعبر عن روح الأرض وكرم مجالسها. احتفت «قرمز» بالشتاء وأجوائه وخصوصاً في الشمال السعودي واستحضرت فيها دفء الصحراء اللي شفناه في افتتاحية العرض بالقطعة المصنوعة بالكامل من صوف الجاعد. المجموعة تاخذك بكل سهولة للصحراء وبردها وليلها ونجومها ورملها

وش فلسفة «قرمز»؟

علامة «قرمز» تأسست عام 2017 على يد عبدالرحمن العابد. فكرتها تربط التراث بروح العصر، وتقدّم الأزياء كجزء من أسلوب حياة يشمل العطور والمجوهرات والإكسسوارات. هدفها إنها تحوّل الإرث الثقافي لتجربة معاصرة تعبّر عن الأصالة السعودية بلغة يفهمها العالم

وش يميّز تصاميم المجموعة؟

أعجبني جدا تنقل التصاميم بين القطع المحلية البحتة وبين القطع اللي تعتبر عالمية. فنشوف الفروة يتبعها مباشرة فستان مخمل انسيابي. أو الجبة يجي وراها زي من أزياء الشارع. وأعتقد هذي نقطة قوة عند قرمز، وهي القدرة التجارية على التعامل مع الخطين بسلاسة وفهم الاثنين وتقديمهم وتنفيذهم بشكل، في نظري، يبين نضج العلامة

وش الرموز الثقافية في العرض؟

العرض كان مليان رموز من الثقافة المحلية واللي أشوفها استخدمت بأسلوب استعراضي جميل وممتع للحاضرين، وفي نفس الوقت يأكد على مواطن استلهام المجموعة

الربابة والقصيدة والدحّة الشمالية اللي شكّلوا البداية، واستخدام السيف كممسك للحقائب، والعارضة المتلثمة بالشيلة، والكلب السلوقي اللي يرمز لحياة الصيد في الصحراء، وخاتمة العرض بالبخور في إشارة الى المثل السعودي، مابعد العود قعود

وش أبرز الخامات؟

أول وثالث اطلالة في العرض كانت للبشت المصنوع من الجاعد، وهو صوف الخروف بهيئته المنفوشة. الاطلالة هذي رجعتني مباشرة في الذاكرة لأيام جدي الله يرحمه وهو يستخدمه في سيارته لتدفئة المراتب. الجاعد، كان يستخدم بأشكال متعددة على هيئته هذي بالاضافة الى لبسه كبشت للتدفئه. فكنت أشوفه في الزل والفرش كثير، وبالأخص في التخييم في فصل الشتاء

وش خلاصة التجربة؟

مجموعة «هبّت شماليّة» تبيّن نضج «قرمز» وفهمها لهويتها وسوقها. المجموعة متماسكة في رؤيتها وواضحة في رسالتها. فيها حس وطني صادق، وتنفيذ متقن مريح للعين

فريق التحرير: غادة الناصر، هاجر مبارك، منار الأحمدي، وجدان المالكي

منسوج، لكل ما يخُص قطاع الأزيـاء المحلي