✍ مراجعة بقلم: غادة الناصر

وش بدأت فيه «منى الشبل» رحلتها؟

بدأ عرض «منى الشبل» لمجموعتها «رحلة» بقطعة جاكيت عليها نقشات الحناء اللي ارتبطت بعلامة «منى الشبل»، ومعاها تنورة طويلة براقة. من أول نظرة، نقدر نقول إن «كلاسيكيات» «منى الشبل» كانت حاضرة وموجودة، لكن مع التنورة يبدو وكأن العلامة قاعدة تختبر مسار جديد؟

يمكن لاستكشاف ذائقة عملائها الحاليين من جهات أخرى، أو لاستكشاف سوق أوسع بعملاء جدد؟

بكل الأحوال، الإضافة لازالت محافظة على العناصر اللي تميز علامة «منى الشبل» من دقة وإتقان وحرفية عالية في التصميم والتنفيذ ترضي عميلها المحلي والعالمي

وش يميز أسلوب «منى الشبل»؟

علامة «منى الشبل» تقدم لعميلها ذوق متوازن: عملي جدا، أنيق جدا، ومفهوم عالميًا. هذا بالإضافة إلى لمساتها الهادية اللي ترمز للتراث وللثقافة، يساعدها تبني ولاء طويل المدى بينها وبين عميلها

تعجبني كثير القصات الطويلة المسترسلة، التصاميم الهادية، اللي تناسب وتضبط في مختلف المناسبات، سواء كانت استقبال ملكي أو افتتاح لعرض أزياء

وش أكثر الخامات اللافتة؟

اللي لفتني كثير في «رحلة» استخدام خامات الجينز. قطع كاملة مصنوعة من الدنيم، لكن مُنفذة بإتقان عالي جدًا اللي أحب أشوفه في علامة «منى الشبل». الخامة جت كأساس لتصميم يحمل روح العلامة ويبرز حرفيتها مو كتفصيل جانبي

وش القطعة اللي ختمت «الرحلة»؟

القطعة الختامية كانت كورسيه مقطّع بالليزر بنقوش الحناء اللي تتميز منى فيها. يمكن تكون بعيدة شوي عن الخط العملي المعتاد للعلامة، لكنها خطوة ممتعة وتفتح اتجاه جديد، وقاعدة عملاء أوسع. وتعطي «منى الشبل» فرصة تتباهى بقوة التنفيذ والاتقان عندها. وتحسها إعلان بسيط إن «منى الشبل» ما وقفت، هي قاعدة تتطوّر وتتحرك بثقة في كل مرحلة من «رحلتها» المستمرة

فريق التحرير: غادة الناصر، هاجر مبارك، منار الأحمدي، وجدان المالكي

منسوج، لكل ما يخُص قطاع الأزيـاء المحلي