✍ مراجعة بقلم: غادة الناصر

وش تقول مجموعة «المستقبل هنا»؟

علامة «أويكن» بهالمجموعة تفتح حوار بين زمنين: المستقبل اللي نمشي له بسرعة، والواقع اللي نعيشه اليوم. التصاميم حاولت توازن بين الاثنين، فكانت حديثة بتفاصيلها، لكنها قريبة من الاستخدام الواقعي. المجموعة تبقى قريبة من الشارع، من الحياة اليومية، لكنها تحمل إحساس ونظرة مستقبلية

وش اللي ميّز المجموعة عن غيرها؟

اللي ميّز المجموعة عن غيرها هو طابعها المستقبلي اللي بان في البناء والتصميم، باستخدام خامات عملية وخياطة دقيقة تعكس فكر واضح وتنفيذ متقن. الألوان كانت محايدة وهادية، تخدم الفكرة الأساسية عن التوازن بين الواقع والمستقبل. اللافت أكثر هو اللمسة اليابانية والشرق آسيوية اللي ظهرت في العرض، لكنها اندمجت بسلاسة مع أسلوب العلامة المعروف بالانسيابية والخطوط المستقيمة، وكأنها تلمّح لطموح العلامة بالوصول العالمي. حتى اسم المجموعة «المستقبل هنا» يعكس رؤية تربط بين العوالم في حاضر متصل ومفتوح. التفاصيل الهندسية، خصوصاً المثلثات اللي تكررت كعنصر زخرفي أو في القصّات، كانت إضافة لافتة وأنيقة، خصوصاً لمحبي الطابع الهندسي في الأزياء

وش هوية العلامة؟

علامة «أويكن» هي علامة سعودية معاصرة تحمل رسالة توعوية شعارها «افتح عينيك»، تدعونا للنظر للواقع بعيد عن العالم الافتراضي. تقدّم أزياء مريحة ومُتقنة تشمل القمصان والهوديات والسترات والشنط. وشاركت ضمن برنامج «مئة علامة سعودية» في أسبوع الموضة بباريس عبر منصة «ترانوي»، اللي يأكد طموحها وحرصها على الحضور العالمي كعلامة سعودية شابة

وش خلاصة التجربة؟

بان لنا نضج «أويكن» في فهمها لأسلوبها كعلامة. المجموعة متزنة في رؤيتها، دقيقة في تنفيذها، وتطرح المستقبل من زاوية إنسانية قريبة وبعيدة عن المبالغة. العلامة قاعدة تمشي بخط ثابت، وتبني لنفسها موقع واضح في مشهد الأزياء المحلي والعالمي وأتوقع لنا نجاح تجاري جميل

فريق التحرير: غادة الناصر، هاجر مبارك، منار الأحمدي، وجدان المالكي

منسوج، لكل ما يخُص قطاع الأزيـاء المحلي